Secretaría Xeral para o Deporte Xunta de Galicia

Novas

26.12.2016

Marta Míguez visita varios centros deportivos da provincia de Lugo que foron reformados pola Xunta de Galicia

Durante a xornada, Marta Míguez puido comprobar o resultado das actuacións levadas a cabo nas pistas de pádel de Foz e Barreiros así como no complexo deportivo municipal de Mondoñedo

Imprimir Atrás

Foz, Barreiros e Mondoñedo (Lugo), 26 de decembro de 2016.- A secretaria xeral para o Deporte, Marta Míguez Telle, visitou esta mañá varios centros da provincia de Lugo que foron reformados e acondicionados grazas ao financiamento da Xunta de Galicia comprometido no pasado mes de setembro a través de tres convenios de colaboración cos Concellos de Foz, Barreiros e Mondoñedo.

Así, a responsable autonómica do deporte galego acudiu á pista de pádel existente en Marzán, no municipio de Foz, tras levar a cabo o seu acondicionamento que consistiu na instalación dunha estrutura metálica, cristal e céspede artificial. O importe total das actuacións foi de 12.642,32 euros dos que a Xunta de Galicia achega 4.500 euros e o Concello de Foz 8.142,32 euros.

A continuación, a secretaria xeral para o Deporte supervisou a finalización das obras da cuberta da pista de pádel de Barreiros que tiveron un importe de 49.796,29 euros dos que a Xunta de Galicia achega a súa totalidade.

Por último, Marta Míguez, acompañada polo delegado da Xunta en Lugo, José Manuel Balseiro, inaugurou oficialmente o complexo deportivo municipal de Mondoñedo, no que se realizaron diversas reparacións. O importe total das actuacións foi de 26.005,85 euros dos que a Xunta de Galicia achega 25.000 euros e o Concello de Mondoñedo 1.005,85 euros.

Vistas:  332

© Secretaría Xeral para o Deporte -  Aviso legal
EGAP - Rúa Madrid 2-4 (Fontiñas), 2ª andar - 15781 Santiago de Compostela - TLF. 881 996 342 Fax: 881 996 346

Pode suscribirse ás novidades desta web cun lector de feeds