A secretaria xeral para o Deporte inaugura o novo ximnasio municipal de Ponte Noalla, en San Cibrao das Viñas Escoitar

Ourense e San Cibrao das Viñas (Ourense), 27 de xaneiro de 2017.- A secretaria xeral para o Deporte, Marta Míguez Telle, participou hoxe na inauguración do novo ximnasio municipal de San Cibrao das Viñas situado en Ponte Noalla. Alí, a máxima responsable do deporte a nivel autonómico destacou como obxectivo prioritario da Xunta de Galicia “crear as condicións para que a poboación galega goce dunha vida máis activa e contribuír ao benestar para acadar unha Galicia máis Saudable”.
Nesta liña, falou da nova instalación deportiva que abre as súas portas hoxe e cuxo equipamento foi financiado pola Xunta de Galicia a través dunha partida de 20.000 euros. A secretaria xeral animou aos veciños de San Cibrao a usar este novo equipamento para acadar unha vida máis activa e saudable que afaste “a posibilidade de contraer enfermidades provocadas polo sedentarismo e a práctica insuficiente de actividade física”.
Na mañá de hoxe, a secretaria xeral tamén mantivo un encontro de traballo coa delegada territorial da Xunta en Ourense, Marisol Díaz Mouteira, coa que avanzou nas actuacións deportivas que se levarán a cabo no presente exercicio na provincia.