A Secretaría Xeral para o Deporte avanza no deseño dun parque acuático no Complexo Deportivo de Monterrei que contará cun investimento aproximado de 6 millóns de euros

Pereiro de Aguiar (Ourense), 27 de agosto de 2018.- A secretaria xeral para o Deporte, Marta Míguez, acompañada por técnicos da Xunta de Galicia e por unha consultora especializada no deseño de parques acuáticos visitou na mañá de hoxe o Complexo Deportivo de Montetrrei.

Esta visita ao complexo que albergará o parque acuático é de vital importancia para o seu deseño xa que é necesario reorganizar a parcela mantendo determinados espazos deportivos que os usuarios utilizan actualmente. Así mesmo, este deseño pretende manter a contorna natural, os espazos verdes e a vexetación existente, facendo do futuro parque acuático un lugar agradable para os seus visitantes.

Deste xeito, a Xunta de Galicia traballa no deseño dun parque acuático novo e atractivo, cun investimento próximo aos 6 millóns de euros e unhas dimensións ao redor dos 35.000 metros cadrados. Estes datos serán cuantificados definitivamente de acordo ao resultado do estudo de viabilidade, que será presentado á Secretaría Xeral para o Deporte antes do remate do presente ano.

Para a previsión de uso do parque terase en conta a poboación residente, así como as visitas grupais de provincias limítrofes e do norte de Portugal. O futuro parque estará deseñado pensando na familia, tendo en conta as posibilidades de lecer que rodean a este espazo e que forman parte do actual Complexo Deportivo. A eficacia na xestión e a eficiencia enerxética serán aspectos fundamentais para obter unha instalación co maior rendemento social e económico posible.

O deseño e construción do parque acuático do Complexo Deportivo de Monterrei é unha actuación que a Xunta de Galicia realizará conxuntamente coa Deputación de Ourense.