Noticias
27/11/2018
Institucionais

A Xunta aposta por impulsar o turismo deportivo como aliciente para achegarse á provincia de Ourense durante todo o ano

Nava Castro e Marta Míguez salientaron o traballo do Goberno autonómico a través de novas experiencias turísticas ou recuperación de infraestruturas fluviais e náuticas

Cenlle (Ourense), 27 de novembro de 2018.- O deporte brinda numerosas oportunidades á Comunidade galega para consolidarse como un destino ao que viaxar en calquera época do ano, por iso a Xunta de Galicia está a apostar por potenciar o turismo deportivo a través de novas experiencias turísticas así como a recuperación de infraestruturas que favorezan a práctica deportiva e impulsen o desenvolvemento turístico.

 

Así se puxo de manifesto hoxe na localidade ourensá de Cenlle no transcurso da Xornada de Turismo Deportivo Ourense 2018 que contou coa participación da directora de Turismo de Galicia, Nava Castro, así como da secretaria xeral para o Deporte, Marta Míguez. Ambas puxeron de manifesto o pulo que se está a dar a este tipo de turismo tamén na provincia de Ourense, como importante impulso para reforzar o seu atractivo durante todo o ano.

 

“O deporte encaixa á perfección co modelo turístico que defendemos e practicamos na Xunta de Galicia”, explicou Nava Castro, quen se referiu a iniciativas como o impulso dos centros BTT para facilitar a práctica deportiva do ciclismo de montaña ou o fomento do coñecemento dos recursos paisaxísticos nos parques naturais da provincia, a través das actividades de turismo activo. Grazas a elas é posible coñecer o Parque de Serra da Enciña da Lastra a bordo de un kaiak ou entrar nalgunha das súas covas para facer espeoloxía. Tamén descubrir o Parque do Invernadoiro ou o Xurés a través de orixinais rutas ciclointerpretativas, combinándoo con estadías no rural galego.

 

Pola súa banda, a secretaria xeral para o Deporte, sinalou que “falar de turismo en Galicia é falar de deporte”, e destacou dous dos eventos que tiveron lugar na cidade de Ourense nas últimas datas como o Salón do Deporte e o Turismo Activo Sportur Galicia e a Carreira Popular Pedestre San Martiño. Marta Míguez salientou a importancia do sector termal que en Galicia conta con “300 captacións de augas termais, máis de 20 balnearios e 5 talasos, que dispoñen de más de 3.000 prazas hosteleiras”. “Todos os recursos deportivos de Galicia atraen turistas e todos os recursos turísticos de Galicia atraen deportistas”, sentenciou.

 

A Consellería de Cultura e Turismo tamén está promover, ademais, as actividades turísticas ao redor dos ríos, especialmente o Sil, Ulla, Tambre e o Miño con proxectos como o que se está a impulsar en Cenlle para a recuperación ambiental e a senda peonil do embalse de Castrelo de Miño ou a colaboración que se ten feito para a promoción internacional do Centro de Adestramento de Remo Laias-Arnoia, entre outras accións.

Durante a xornada púxose de manifesto o papel estratéxico que o turismo deportivo ten en Galicia no seu conxunto polo seu importante potencial para descentralizar a actividade turística e por permitir achegar os beneficios do turismo tanto á costa como ao interior, dando así resposta aos compromisos da Estratexia do turismo de Galicia 2020.