Coñece Xogade
Xogade (Xogos Galegos Deportivos en idade escolar) é un programa nado na tempada 2009/10 para dar resposta ao Plan Galicia Saudable da Xunta de Galicia, en colaboración coas federacións e agrupacións deportivas escolares galegas. Máis do 50% dos/as escolares galegos/as de entre 6 e 16 anos gozan da experiencia Xogade, chegando a preto de 150.000 nas últimas tempadas.
Este programa ten como iniciativa levar a actividade a todos os concellos galegos, mentres brinda a todos/as os/as escolares galegos/as a posibilidade de practicar e competir con outros colexios e clubs.
O programa Xogade combina no seu modelo deportivo competición e participación para os/as escolares dos centros educativos de toda Galicia.
O obxectivo primordial desta concepción do deporte será a promoción da saúde, a condición física e o benestar, sen esquecer nin deixar de lado o rendemento deportivo, pero asegurando que todos/as os/as escolares poidan ter acceso á práctica de actividades físico-deportivas sen que exista ningún tipo de discriminación. Adóptanse todas as medidas necesarias para facilitar a participación das persoas con diversidade funcional.
O programa Xogade ten como obxectivos incrementar a participación, especialmente entre as nenas (de feito, a participación feminina e masculina ronda o 50% na Actividade Deportiva Escolar), aproveitando o potencial educativo do deporte e priorizando a participación sobre a competitividade. Promove a cohesión social, mellora a saúde con hábitos activos, ensina técnicas deportivas e valores como o xogo limpo e introduce aos/ás deportistas en diversas disciplinas de maneira lúdica. Ademais, fomenta a convivencia e a comunicación entre todos/as, promovendo valores como a tolerancia e o respecto, achegando aos e ás escolares as estruturas deportivas locais e os xogos tradicionais galegos.
Xogade é unha ferramenta moi útil para o Proxecto de Vida Activa e Deportiva (PVAD), que busca coordinar os esforzos da comunidade educativa tanto dentro como fóra do horario lectivo para aumentar a actividade física saudable dos/as escolares dentro do Plan Galicia Saudable.
A Xunta de Galicia destina cada ano máis de 3 millóns de euros ao deporte escolar.
Actuacións do programa Xogade
Actividade deportiva escolar: competicións non federadas de carácter participativo para dar a coñecer diferentes deportes.
Actividade deportiva federada e seguro deportivo 6-16: ofrécese un seguro deportivo a cada deportista rexistrado/a en Xogade, xa sexa en Actividade Deportiva Escolar ou por ter unha licenza federativa das federacións deportivas galegas adheridas ao programa.
Coñece o meu club: Xogade busca poñer en contacto a centros escolares con clubs deportivos da súa contorna, para que estes visiten o centro escolar e dean a coñecer a súa actividade deportiva. O obxectivo é facilitarlles aos e ás escolares o coñecemento dos recursos deportivos dispoñibles para o seu tempo de lecer.
Xogando coa auga e co vento: achegamento dos/as escolares ao mar e ao río a través do bautismo de distintos deportes acuáticos como o surf, o piragüismo, o remo ou a vela, entre outros.
Xogos tradicionais e populares: préstamo de materiais de birlos, billardas e chaves aos centros escolares e ás ANPA para o fomento dos xogos tradicionais e populares.
Se ten interese en inscribirse nalgún destes programas, ou en coñecer o calendario e a normativa, prema sobre esta ligazón: https://xogade.xunta.gal/