Saúdo

Marta Míguez Telle

A chegada de Alberto Núñez Feijóo á presidencia da Xunta de Galicia significou que o deporte organizativamente volva ter consideración de secretaría xeral, dependendo directamente da presidencia. Unha decisión que demostra a firme aposta polo deporte do presidente, que elixiu a José Ramón Lete Lasa para dirixir o departamento que coñecía á perfección, debido a que desde maio de 2003 ata xullo de 2005 foi director xeral, cando Deportes dependía da Consellería de Familia, Muller e Voluntariado, con Pilar Rojo como conselleira. En decembro de 2016, tras a incorporación de José Ramón Lete Lasa ao Consello Superior de Deportes, como presidente, foi designada Marta Míguez Telle como nova Secretaria Xeral para o Deporte.

A primeira Secretaría Xeral para o Deporte naceu no ano 1989, cando Manuel Fraga Iribarne foi elixido presidente da Xunta de Galicia, ata xaneiro de 2003, data a partir da cal se converteu en Dirección Xeral dependente da Consellería de Familia, Muller, Deporte e Voluntariado. 

A Secretaría Xeral para o Deporte conta cunha subdirección xeral e tres servizos; o de coordinación deportiva, do que depende o deporte escolar; o de obras e o de contratación. En cada provincia hai un xefe de servizo que desempeña a representación da Secretaría Xeral para o Deporte.

Marta Míguez Telle

Licenciada en Educación Física e Deporte, Marta Míguez Telle realizou ata unha vintena de cursos orientados á xestión de servizos públicos, administración e deporte, ademais de diversos másteres, como o Máster de Dirección e Xestión de Entidades Deportivas (Vigo) e o Máster Universitario en Xestión Empresarial do Deporte.

Marta Míguez Telle destaca no ámbito deportivo polos seus cinco campionatos de España absolutos de xavelina (1998,1999, 2000, 2001 e 2002) e os seus seis campionatos de Galicia absolutos de xavelina (1993,1997, 1998, 2000, 2001 e 2002).  Ademais, posúe sete récords absolutos de Galicia e tres de España.

No panorama internacional, representou a España nos Xogos Olímpicos de Sídney 2000 e conseguiu a medalla de prata nos Xogos Iberoamericanos de Guatemala (2002) e o bronce nos Xogos do Mediterráneo de Túnez (2001). No seu currículo figuran máis dunha vintena de eventos e encontros deportivos internacionais.

Ao longo da súa traxectoria profesional ocupou os seguintes cargos:

  • Xerente do Consello Municipal de Deportes de Ourense, desde novembro de 2002 ata maio de 2007.
  • Coordinadora de Deportes do Consello Municipal de Deportes de Ourense, desde maio de 2007 ata decembro de 2016.