O número de deportistas galegos recoñecidos no alto nivel segue medrando e chega aos 1.456

Santiago, 8 de decembro de 2024.- O Diario Oficial de Galicia vén de publicar a resolución do 27 de novembro de 2024 pola que se recoñecen as persoas deportistas de alto nivel, alto rendemento, e rendemento deportivo de base, persoas adestradoras ou técnicas, persoas xuízas e árbitras recoñecidas de alto nivel, e se relacionan as solicitudes desestimadas e a causa. No momento actual, o número total de deportistas galegos e galegas recoñecidos e recoñecidas segue batendo récords e chega xa a 1.456, aumentando tamén a paridade de xénero, sendo 593 mulleres (41%) e 863 homes (59%).

Arredor do 77% de todos os recoñecidos -1.116- son deportistas galegos de alto nivel (458 mulleres e 658 homes). Ademais, hai 155 deportistas de rendemento deportivo de base (70 mulleres e 85 homes); 115 deportistas de alto rendemento (42 mulleres e 73 homes); 38 técnicos de alto nivel (catro mulleres e 34 homes); 21 árbitras e xuízas (catorce mulleres e sete homes); e once deportistas galegos de alto nivel vitalicios (cinco mulleres e seis homes). Entre estes DGAN vitalicios atópanse algúns dos mellores deportistas de Galicia como Carlos Arévalo, Carlos Pérez ‘Perucho’, Teresa Portela e Cristian Toro (piragüismo), Támara Echegoyen, Nico Rodríguez e Sofía Toro (vela), Adi Iglesias (atletismo adaptado), Susana Rodríguez Gacio (paratríatlon), Chano Rodríguez (natación adaptada) e, nesta nova resolución súmase Enmanuel Reyes (boxeo). Cómpre salientar, asemade, que entre todas as categorías están recoñecidos 46 deportistas galegos (16 mulleres e 30 homes) con diversidade funcional, o número máis alto da historia que segue a medrar.

Estas cifras acadadas polo deporte de alto nivel de Galicia débense por unha banda, ao traballo e ao incremento de nivel dos deportistas de Galicia nos últimos anos, así como ao novo decreto de alto nivel publicado en setembro de 2020 que, ademais do deporte de alto nivel de Galicia, tamén recoñece o alto rendemento deportivo -práctica deportiva que aínda non pode ser cualificada de alto nivel pero cuxa proxección indica que estará en condicións de selo- e o rendemento deportivo de base -etapa de desenvolvemento e perfeccionamento previa a acadar o alto rendemento deportivo ou o alto nivel-. O mesmo ocorre coas categorías de técnicos-adestradores e xuíces-árbitros, novos colectivos que se incorporan a figura do alto nivel, a través da Comisión Galega de Avaliación do Alto nivel deportivo.

Axudas ao alto nivel

O pasado 29 de novembro, a Xunta anunciaba unha nova convocatoria de axudas DGAN – TAXAGAN para deportistas galegos de alto nivel, así como técnicos, adestradores, xuíces e árbitros de alto nivel 2024 cun orzamento de 300.000 euros. Estas axudas súmanse ás Axudas Galicia-París 2024 que supuxeron un total de 436.500 euros para a participación dos deportistas nos Xogos Olímpicos e Paralímpicos de París 2024. En total, a contía das axudas concedidas ás persoas deportistas do alto nivel ao longo deste exercicio acada 736.500 euros e volve rachar o seu teito histórico.