A Xunta reivindica a “importancia capital do mar no deporte” co 7,5% das licenzas correspondente a modalidades náuticas

Sanxenxo (Pontevedra), 19 de setembro de 2025.- O secretario xeral para o Deporte, José Ramón Lete Lasa, asistiu no serán de hoxe ao 6º Simposio de Clubs Náuticos ‘O Turismo Náutico como fomento do deporte e a náutica social’ no que participou na mesa redonda: ‘Deporte como fomento do turismo náutico. Clubs náuticos e deporte de base’.

Alí, destacou a importancia dos deportes náuticos para Galicia xa que, mentres en España as licenzas deportivas das modalidades acuáticas representan o 4,1% do total, en Galicia esa porcentaxe aumenta ata o 7,5% grazas ás federacións de surf, vela, piragüismo, actividades subacuáticas, pesca, motonáutica, salvamento e socorrismo, tríatlon, remo e esquí náutico. Neste sentido tamén apuntou que Galicia achega unha de cada dez das licenzas acuáticas coas que conta España.

Máis aló das licenzas, Lete Lasa destacou os éxitos dos deportes náuticos galegos lembrando que, das 23 medallas olímpicas galegas colleitadas ao longo da historia, 18 delas -o 78%- pertencen a deportes náuticos como piragüismo (14), vela (3) e tríatlon (1).

No caso concreto da vela galega sinalou as 2.300 licenzas e 67 clubs con actividade en 2024 que a converten nun referente nacional e internacional. A Xunta de Galicia investiu de xeito directo nos últimos anos máis de 6,7 millóns de euros na vela, destacando o apoio aos deportistas do Centro Galego de Vela de Vilagarcía de Arousa. “Estamos ante unha aposta decidida e comprometida, dentro do carácter polideportivo do deporte galego, na que sempre queremos potenciar os deportes náuticos en xeral e a vela, en particular”, asegurou.