Lete Lasa destaca a “importancia das familias” e do programa ‘Xogade coas motos’ na gala do club de motociclismo VF Timing

Pontevedra, 23 de novembro de 2025.- O secretario xeral para o Deporte, José Ramón Lete Lasa, participou na Gala Fin de Tempada do club motociclista VF Timing, que celebra o seu décimo aniversario. Alí, gabou a traxectoria dun club que xa conta con máis de dez anos con campionato propio, máis de 15 probas do Campionato Galego de Velocidade, catro Campionatos de España de Supermoto, dous Campionatos de España de Minivelocidad, así como un Campionato do Mundo e outro de Europa de Supermoto.

Nas súas verbas, Lete Lasa destacou a “importancia das familias na construción dos soños dos deportistas e no apoio constante no seu vínculo co deporte”. Neste sentido, sinalou como en VF Timing “os pilotos medran e fanse maiores no asfalto”, destacando exemplos como o campión de España de mini GP 110, Martín Portela ou o campión da Yamaha R7 European Cup, Marco Díaz.

O secretario xeral para o Deporte tamén subliñou o programa ‘Xogade coas motos’ nacido no ano 2023 grazas a unha colaboración entre a Xunta de Galicia e VF Timing e que, nestes tres últimos anos xa ten levado a preto de 800 rapaces e rapazas de entre 6 e 16 anos ao seu primeiro achegamento ao motociclismo, quedando moitos deles, inscritos na federación.