Torneo Concentración Pickleball Galicia Calidade
Manzaneda acollerá o Torneo-Concentración Pickleball Galicia Calidade os días 15 e 16 de novembro
A Estación de Montaña Cabeza de Manzaneda será o escenario do Torneo-Concentración Pickleball Galicia Calidade, que se celebrará os días 15 e 16 de novembro de 2025, nun evento que combinará competición, formación e convivencia entre a comunidade galega de pickleball.
O programa inclúe non só as probas deportivas, senón tamén unha reunión de traballo clave para definir o Plan Estratéxico Pickleball 2026, na que se abordarán temas como o Circuíto Autonómico e a Competición por Equipos da vindeira tempada.
A xornada do sábado rematará cun momento especial de confraternización: unha cea organizada pola Federación Galega de Tenis para todos os participantes, que servirá de punto de encontro para compartir ideas e reforzar os lazos entre clubes e xogadores.
Durante a fin de semana disputarase un completo calendario competitivo con categorías absolutas e veteranas, tanto en modalidades de parellas como individuais e mixtas, garantindo un mínimo de tres partidos por xogador. O domingo celebrarase a entrega de premios acompañada dun aperitivo.
As inscricións estarán abertas ata o 12 de novembro a través da plataforma www.ibertenis.com, e todos os participantes deberán contar coa licenza federativa da FGTenis.
O evento conta coa colaboración da Xunta de Galicia, Galicia Calidade, HEAD, TennisLife, a RFET e Marvi, e reafirma o compromiso da Federación Galega de Tenis co crecemento e consolidación do pickleball como deporte emerxente en Galicia.