Nova
04/04/2020
Institucionais

A fórmula galega das 'Píldoras Solidarias' estende o seu efecto a unha vintena de países

O secretario xeral para o Deporte, José Ramón Lete Lasa, asegura que “estes datos falan dunha magnífica resposta do deporte a unha situación excepcional como é a do confinamento”

Santiago de Compostela, 4 de abril de 2020.- A iniciativa da Sociedade Iberoamericana de Psicoloxía do Deporte (SIPD) co apoio da Universidad Liberquaré e da Secretaría Xeral para o Deporte, Píldoras Solidarias. Entrenamiento Mental cumpre quince días nos que vén de levar a cabo as súas primeiras dez entregas que contaron cunha excepcional acollida cifrada en 56.473 impactos en deportistas, adestradores e outros profesionais do deporte. Ante esta masiva resposta, a SIPD vén de ampliar as Píldoras Solidarias incorporando a novos profesionais referentes de Mexico, Cuba, Portugal, Chile, Arxentina, Uruguai, Costa Rica, Colombia, España e Nicaragua e chegando xa a unha vintena de países.

Perante estes resultados, o proxecto consolídase como unha ferramenta idónea para axudar á preparación e motivación dos e das deportistas, técnicos e técnicas, así como todos os representantes do tecido deportivo neste período de confinamento derivado da declaración do estado de alarma pola expansión do coronavirus.

En palabras do secretario xeral para o Deporte, José Ramón Lete Lasa, “estes datos falan dunha magnífica resposta do deporte a unha situación excepcional como é a do confinamento”. Ademais destacou a “responsabilidade do deporte galego xa que os nosos deportistas e adestradores son uns dos que máis interese mostran nas píldoras”.

Todos os días ás 18,00 horas as Píldoras Solidarias de 10 minutos de duración serán retransmitidas a través do servizo de videoconferencia Zoom e emitidas polas canles de Facebook e Instagram da Univerasidad Liberquaré. Tamén poden ser revisadas na web www.sipd.org e www.mastersipd.com, así como na canle oficial da Universidade en YouTube.