Lete destaca a importancia de transmitir a nobreza do karate entre os máis novos na presentación do Nacional cadete, júnior e sub-21 de Pontevedra

25 de novembro de 2022.- O secretario xeral para o Deporte, José Ramón Lete Lasa, participou na mañá de hoxe na presentación do Campionato de España Cadete, Júnior e Sub-21 de Karate que terá lugar esta fin de semana en Pontevedra e no que participarán un total de 757 deportistas das 17 comunidades autónomas españolas e que contará con 38 karatekas galegos e galegas.

O mandatario galego destacou o excelente nivel de Galicia nos deportes de loita e combate como demostran os grandes deportistas galegos e galegas nas disciplinas de judo, taekwondo ou loita libre olímpica, que vén de celebrar o seu Mundial sub-23 tamén na cidade de Pontevedra. Neste sentido, Lete Lasa destacou, ademais da calidade técnica destes deportistas, a súa nobreza e humildade, valores que transmiten, sobre todo, as artes marciais.

Nas súas verbas o secretario xeral para o Deporte animou a algúns dos mellores deportistas galegos que competirán no Campionato de España de Karate como Victor Mallo (número 6 do ranking nacional sub21 -60kg), Nicolás Pinaque (número 2 do ranking nacional sub21 -67kg), Lucía Guerrero (número 2 do ranking nacional sub21 -68 kg e número 98 do ranking mundial sub21 -68kg), Simón Cancelo (número 7 do ranking nacional sub21 -60 kg.), Martina Soto (número 4 do ranking nacional júnior -59 kg.), Eva Rodríguez (número 2 do ranking nacional júnior -48kg.), Adrian Barcia (número 3 do ranking nacional júnior -68kg) ou Alba Rocha (bronce na segunda fase da Liga Nacional 2022), todos eles relacionados co Centro Galego de Tecnificación Deportiva e que “fannos soñar con grandes opcións de medalla”.