Nova
15/06/2021
Institucionais

Lete Lasa destaca a Adrián Mosquera como un novo referente do piragüismo galego para o mundo

Asegura que a Xunta acompañará a Adrián Mosquera nos Xogos Paralímpicos como demostra a Axuda Reto Galicia-Toquio con Igualdade cunha contía de 5.000 euros; ademais no ano 2020, Mosquera recibiu unha bolsa de 1.500 euros como deportista galego de alto nivel

Boiro (A Coruña), 15 de xuño de 2021.- O secretario xeral para o Deporte, José Ramón Lete Lasa, visitou esta mañá o Club de Piragüismo Rías Baixas de Boiro onde mantivo un encontro con Adrián Mosquera, o primeiro piragüista galego que participará nuns Xogos Paralímpicos en Toquio.

Lete Lasa lembrou algúns fitos olímpicos do piragüismo galego como os representados por David Cal, o deportista olímpico español máis laureado de todos os tempos con cinco medallas ou Teresa Portela, que nestes mesmos Xogos de Toquio converterase na española con maior número de participacións olímpicas con seis. Neste sentido, asegurou que a clasificación acadada por Adrián Mosquera para os Xogos Paralímpicos na categoría VL3 200 metros tras gañar a medalla de ouro na Copa do Muno de Szeged (Hungría) no pasado mes de maio, converte ao de Rianxo no primeiro padexeiro galego en disputar uns Xogos Paralímpicos e tamén, “nun novo referente do piragüismo galego para o mundo”.

Lete Lasa asegurou que a Xunta acompañará a Adrián Mosquera nos Xogos Paralímpicos como demostra a Axuda Reto Galicia-Toquio con Igualdade cunha contía de 5.000 euros; ademais no ano 2020, Mosquera recibiu unha bolsa de 1.500 euros como deportista galego de alto nivel.

Nas súas verbas, Lete Lasa agradeceu tamén o traballo do Club de Piragüismo Rías Baixas e puxo en valor a importancia do traballo de apoio e motivación que realizan os clubs galegos cos seus deportistas, imprescindible para acadar estas cotas de éxito. Do mesmo xeito, o mandatario galego gabou o traballo da Federación Galega de Piragüismo que leva tantos anos sacando padexeiros e padexeiras galegos e galegas de primeiro nivel que converten ao piragüismo de Galicia nunha potencia a nivel internacional.