Xunta e Clúster avanzan en proxectos para acadar beneficios na economía, no deporte e na saúde de Galicia
Un dos seguintes retos para Galicia será a segunda edición do encontro Interclústeres, que tivo o pasado mes de novembro a súa primeira edición en Extremadura, e para a que a comunidade Galicia foi proposta polo Clúster como sede
Santiago, 11 de marzo de 2022.- O secretario xeral para o Deporte, José Ramón Lete Lasa, mantivo na mañá de hoxe unha xuntanza de traballo cunha representación do Clúster Galego da Industria do Deporte e o Benestar encabezada pola súa xerente, a campioa olímpica, Sofía Toro, que estivo acompañada polo membro da directiva e CEO de Jim Sports, José Manuel Graña. Na xuntanza, ambas institucións exploraron as posibles vías de colaboración de cara a 2022 e os vindeiros exercicios para acadar a importancia que o sector deportivo merece tanto na economía como na sociedade galega. Os obxectivos da Xunta e do Cluster oriéntanse cara uns beneficios a nivel de emprego e creación de riqueza que repercutan na mellora da saúde física e mental da poboación.
Deste xeito, un dos seguintes retos para Galicia será a segunda edición do encontro Interclústeres, que tivo o pasado mes de novembro a súa primeira edición en Extremadura, e para a que a comunidade Galicia foi proposta polo Clúster como sede.
Clúster Galego
A constitución do Clúster en 2021 significa un importante fito de cara a profesionalización da entidade. Nas verbas do mandatario galego, “estamos no momento axeitado para reivindicar a industria do deporte e para sacar peito da nosa fortaleza, pois o deporte galego ten un importante peso na economía galega e estamos ante o momento de visibilizalo”.
Os obxectivos fundamentais do Clúster son impulsar a posta en marcha de servizos innovadores, de calidade e sostibles; deseñar grandes proxectos sectoriais; fomentar a transferencia de coñecemento; propiciar a colaboración público-privada e a posta en marcha de instrumentos de financiamento; crear postos de traballo; fomentar a captación de investimentos; favorecer a internacionalización; proporcionar recursos, formación e asesoramento: así como fomentar hábitos saudables.
O deporte galego representa o 2,5% do PIB de Galicia, cun volume anual de negocio que ronda os 1.600 millóns, e que e que xera arredor de 12.000 postos de traballo.