A Xunta presume do Rallymix Argallo Figueiró como unha das mellores probas do calendario galego
O secretario xeral para o Deporte destacou o músculo do automobilismo galego que, neste ano 2025, conta con dez probas no calendario nacional
Tomiño (Pontevedra), 28 de marzo de 2025.- O secretario xeral para o Deporte, José Ramón Lete Lasa, xunto á directora xeral de Xuventude, Lara Meneses, participou na mañá de hoxe na presentación do II Rallymix Serra do Argallo Figueiró, que terá lugar os vindeiros 12 e 13 de abril en Tomiño, na que será a primeira proba do Campionato Galego de Rallymix.
Nas súas verbas, o responsable do Deporte galego asegurou que “o rallymix é unha disciplina que está de absoluta moda en Galicia e que dase nun terreo mixto combina tramos de terra e de asfalto, polo que os pilotos deben dominar todas as superficies”. Neste sentido valorou a pericia e a calidade de todos os pilotos e copilotos que competirán nesta proba que este ano alcanzarán os 90 equipos.
Lete Lasa felicitou á Escudaría Cantera Competición que, da man do Concello de Tomiño, decidiron botar andar o ano pasado o I Rallymix Serra do Argallo Figueiró e que foi un auténtico éxito recollendo o premio como a mellor proba puntuada no campionato galego.
O secretario xeral para o Deporte destacou ademais o excelente momento que vive o automobilismo galego con dez probas nos calendarios nacionais como os eventos de Carballo e Arteixo no Campionato de España de Autocross, o ECO Rallye da Coruña do Campionato de España de Enerxías Alternativas, o Rías Altas do Campionato de España de Vehículos Históricos, a Subida a Chantada do Campionato de España de Montaña, a Subida á Escusa na Copa de España de Montaña, o Rally de Terra de Galicia do Campionato de España de Rallys de Terra, o Cidade de Narón da Copa de España de Rallys de Asfalto, así como o Rallye Rías Baixas e o Rally de Ourense que estarán, un ano máis, no Supercampionato de España de Rallyes.