A secretaria xeral para o Deporte subliña a “importancia da actividade física na educación dos máis cativos” no cross escolar Xogade de Zamáns no que participaron 800 nenos

Vigo, 25 de xaneiro de 2017.- A secretaria xeral para o Deporte, Marta Míguez Telle, asistiu na mañá de hoxe a carreira de cross de centros escolares que tivo lugar na parroquia olívica de Zamáns. Alí, a máxima responsable do deporte a nivel autonómico destacou a “importancia do deporte na educación dos máis cativos porque xera modelos de vida saudable que lles acompañarán ao longo da súa vida”.
Esta iniciativa está patrocinada polo programa Xogade que a Secretaría Xeral para o Deporte leva a cabo xunto as Federacións e Agrupacións Deportivas Galegas e que recolle toda a actividade deportiva e lúdica, en idade escolar promovida dende a Xunta de Galicia.
Os rapaces que participaron nesta carreira que tivo lugar nas inmediacións do campo de fútbol de O Castro representaron a distintos centros escolares da provincia como o os CEIP Porto Cabeiro, Monterrey, Eduardo Pondal, Igrexa, Doblada, Chans Bembrive, Quiroga ou os colexios San Salvador, Carmelitas, Mercantil, Montecastelo, Acacias e San Fermín. En total participaron 770 nenos e nenas.
Este é o segundo cross infantil ao que acode á secretaria xeral tras a súa participación no cross zonal Xogade de Pontevedra do pasado 23 de decembro no que participaron distintos clubs da provincia e 300 nenos e nenas.